Аз 15 то 20 июли соли 2024 дар шаҳри Уст-Каменагорскии Ҷумҳурии Қазоқистон мусобиқаи ҷаҳонӣ оид ба намуди “Вазнбардорӣ” баргузор гардид. Бо дастгирии Мақомоти иҷроияи ҳокимияти давлатии шаҳри Ҳисор панҷ нафар варзишгарони имконияташон маҳдуди шаҳр дар ҳайати дастаи мунтахаби Тоҷикистон дар мусобиқаи мазкур иштирок карда, бо натиҷаҳои беҳтарин баргаштанд.
Иҷрокунандаи вазифаи раиси шаҳри Ҳисор Носирзода Ҷаббор варзишгаронро бо волидонашон ба ҳузур пазируфта, дар ҷаласаи машваратии корӣ, дар фазои тантанавӣ бо “Сипоснома” ва маблағҳои пулӣ сарфароз гардонид.
Тавре, ҳангоми муаррифии варзишгарон, ки дастпарварони Мактаби варзишии ба номи Абдуманнон Зокирови шаҳр мебошанд зикр гардид, Олимов Мизробиддин – сокини деҳаи Чанори Ҷамоати деҳоти Ориён, соли таваллудаш 2008 дар вазни 52 кг бо бардоштани вазни 80 кг ва гузоштани рекорди ҷаҳонӣ соҳиби медали тилло, Ҳафизов Ҳабибулло – сокини деҳаи Шӯроби Афғони Ҷамоати деҳоти Сомон, соли таваллудаш 1986 дар вазни 68 кг бо бардоштани вазни 120 кг ва гузоштани рекорди ҷаҳонӣ соҳиби медали тилло, Холов Сунатулло – сокини деҳаи Кишоварзи Ҷамоати деҳоти ба номи Мирзо Турсунзода, соли таваллудаш 2009 дар вазни 60 кг бо бардоштани вазни 65 кг соҳиби медали нуқра, Аҳмадов Фатҳиддин – сокини деҳаи Хоҷачилдиёри Ҷамоати деҳоти Мирзо Ризо, соли таваллудаш 2008 дар вазни 68 кг бо бардоштани вазни 90 кг соҳиби медали нуқра ва мураббии Мактаби варзишии шаҳр Насриддинов Мирзобобур – сокини кӯчаи Мирзо Турсунзодаи Ҷамоати шаҳраки Ҳисор дар вазни 95 кг бо бардоштани вазни 140 кг соҳиби медали нуқра гардиданд.
Носирзода Ҷаббор ба варзишгарон, мураббӣ ва падару модаронашон аз номи мақомоти иҷроияи ҳокимияти давлатии шаҳр изҳори сипос карда, барояшон саломатӣ ва музаффариятҳои нав таманно намуд.
Маврид ба ёдоварист, ки варзишгаронро дирӯз дар даромадгоҳи шаҳр муовини якуми раиси шаҳр Каримзода Сироҷиддин, мудири бахши кор бо ҷавонон ва варзиш Шӯҳрат Аминов, раисони ҷамоатҳо ва пайвандону дӯстонашон бо гулу гулдаста пешвоз гирифта, бо дастовардашон муборакбод гуфтанд.
