Иҷрокунандаи вазифаи раиси шаҳри Ҳисор Носирзода Ҷаббор 2 ноябри соли равон, пас аз анҷоми рӯзи қабули шаҳрвандон, бо мақсади шиносоӣ бо фаъолияти корхонаҳои саноатӣ ва рафти кишти тирамоҳии ғалладонагиҳо ба Ҷамоати деҳоти Ҳисор ташриф оварда, дар деҳаи Ҳаёти Нав аз корхонаи навтаъсиси коркарди пахтаи “Органик Котон” ва заминҳои кишти ҶДММ “50-солагии Октябр” боздид намуд.
Роҳбари шаҳр бо шароитҳои қабули пахта дар корхонаи мазкур, аз ҷумла тарозу, ташхисгоҳ, майдони захираи пахта ва сехҳои коркарди он шинос шуда, ба роҳбари корхона ва роҳбарони хоҷагиҳои пахтакор, ки он ҷо ҳузур доштанд барои дастгирӣ ва ҳавасмандии ҳамдигар маслиҳатҳои муфид дод. Таъкид гардид, ки дар оянда корхона барои таъмин намудани хоҷагиҳои пахтакор бо тухмиҳои хушсифат, нуриҳои минералӣ, техникаю мошинолоти кишоварзӣ омодагӣ мегирад ва дар доираи ҳамкориҳои судманд фаъолият намудан, барои ҷонибҳо манфиатовар хоҳад буд.
Ҳамчунин, ба роҳбари шабакаҳои барқи шаҳр барои таъмини бонизоми барқ тариқи хатҳои озод ба ягона корхонаи коркарди ашёи хоми худӣ-пахта дар доираи имкониятҳое, ки доранд, супоришҳои мушаххас дод.
Дар идомаи сафари корӣ роҳбари шаҳр бо ҷараёни шудгор, нурипошӣ ва кишти гандум дар заминҳои ҶДММ “50-солагии Октябр” шинос шуда, механизаторону мутахассисони хоҷагиро ба кишти босифати заминҳо бо риояи қоидаҳои агротехникӣ ҳидоят намуд.
