11 сентябр дар толори мақомоти иҷроияи ҳокимияти давлатии шаҳри Ҳисор таҳти раёсати иҷрокунандаи вазифаи раиси шаҳр Носирзода Ҷаббор ҷаласаи корӣ баргузор гардид.
Нахуст, роҳбари дастгоҳи раиси шаҳр Изатулло Бобоев оид ба тағйироти кадрӣ дар МИҲД-и шаҳр, дар асоси фармоиши Вазири маориф ва илми Ҷумҳурии Тоҷикистон аз 4 сентябри соли 2024, №1024 Сангинов Ҳусниддин Ҳайталиевич таъин шудан ба мансаби мудири шуъбаи маорифи шаҳри Ҳисор ва бо қарори раиси шаҳр аз 10 сентябри соли 2024, №704 ва розигии Кумитаи кор бо занон ва оилаи назди Ҳукумати Ҷумҳурии Тоҷикистон аз 6 сентябри соли 2024, №1-(3)-745 Васихова Зулфия Зафаровна ба мансаби мудири шуъбаи кор бо занон ва оилаи шаҳри Ҳисор гузориш дод.
Сипас, гузориши муовини якум, муовинон ва роҳбари дастгоҳи раиси шаҳр дар бораи фаъолият дар ҳафтаи сипаришуда шунида, вобаста ба гузоришҳои ироашуда, дигар шахсони масъул, мудирони шуъбаю бахшҳои дастгоҳи раиси шаҳр пурсиш карда шуданд.
Носирзода Ҷаббор аснои баррасии масъалаҳои вобаста ба фаъолияти кишоварзон бо такя ба маълумотҳои шуъбаи Агентии омор дар шаҳри Ҳисор ва Раёсати кишоварзии шаҳр рафти ҷамъбасти кишти такрорӣ, омодагӣ ба ҷамъоварии маҳсулоти кишоварзӣ, бахусус меваю сабзавот ва пахтаро дар асоси таҳлилҳои дақиқ мавриди пурсиш ва баррасӣ қарор дода, масъулонро ҷиҳати ислоҳи вазъи соҳа ва камбудиҳои ҷойдошта мушаххас вазифагузорӣ намуд.
.
